BR LA UNION – Nangparnuay iti buteng ken pannakariribuk iti publiko ti naiwaras a bomb threat iti naduma-duma a pagadalan ken establisimento ditoy Siudad ti San Fernando ken kadagiti asideg a munisipalidad ti La Union.
Dagiti naalas a mensahe ken pangta ket nagtaud iti maysa a maipagarop a dummy facebook account a Britney Madonna Kepya.
Segun kenni Provincial Director PCOL. Redentor C. Ulsano Jr. saan laeng a dagiti pagadalan ti nakaawat iti bomb threat, ngem uray dagiti dadakkel a mall ditoy siyudad ti San Fernando ken ti Public Market idiay Bauang.
Iti inisyal nga imbestigasyon dagiti otoridad, napaneknekan a ti ladawan a maus-usar iti Facebook account ket saan a kukua ti tao nga agiwarwaras ti bomb threat. Adda met nagireklamo iti maysa a police station idiay Negros Oriental, a nangibaga a na-hack ti Facebook accountna manipud pay idi 2023, ken saan isuna ti nangipablaak kadagitoy a bomb threat, segun kenni PCOL. Ulsano.
Gapu iti daytoy nga insidente, agtultuloy ti operasyon ti La Union Police Provincial Office babaen iti pananginspeksyon kadagiti pagadalan a nakaawat ti bomb threat.
Daytoy ket tapno masigurado ti seguridad ken makissayan ti buteng ken panagdanag dagiti estudyante, mangisursuro, staff ken nangnangruna dagiti nagannak.
Gaputi insidente, sumagmamano a pagadalan ditoy siyudad ti nag-anunsiyo ti suspensiyon ti face-to-face classes ken nangipatungpal ti asynchronous class, tapno agtultuloy latta ti panagadal dagiti estudyante bayat a maipat-patungpal dagiti kasapulan a security measures.
Innayon pay ti opisyal nga aramiden da amin a wagas wenno pamay-an tapno maamwan ti tao a pudno nga adda iti likudan ken responsable iti malisyoso a bomb threats ken mapagsungbat iti linteg.
Nabilin metten ti amin nga istasyon ti pulisiya ditoy La Union ken provincial mobile force companies iti sidong ti LUPPO a papigsaen ti police presence babaen ti ad-adu pay a panag-patrolya, inspeksiyon, ken panagturong kadagiti pagadalan ken dadduma a vital establishments iti masakopan a lugar tapno masiguro ti kinatalged ti publiko, malapdan dagiti posible a pangta, ken mangipaay kalma ken talged kadagiti estudsyante, school personnel, ken iti kommunidad.
