BR LA UNION – Natiliw met laeng ti Bureau of Immigration (BI) ti maysa a high-profile South Korean fugitive a naglibas idi laeng napan a lawas.
Segun kenni Immigration Commissioner Joel Viado, natiliw manen ni Na Ikhyeon idiay Barangay Pampang, Angeles City, Pampanga bayat ti panangisayangkat iti follow-up operation ti BI Fugitive Search Unit ti ahensiya.
Karaman nga inaresto ti Bureau of Immigration ti maysa pay a South Korean a mapapati a timmulong kenni Na tapno makalibas iti kustodiya ti Imigrasyon.
Maipalagip a naaresto ni Na idi Mayo 2023 ken naitantan ti pannakaideporta na gapu iti kaso a naipila kontra kenkuana mainaig iti estafa.
Kabayatanna, naglibas ti pugante idi Marso 4 bayat a madama ti hearing maipapan iti kasona nga estafa.
Naammuan iti imbestigasyon a nakalibas ti suspek babaen ti court restroom.
