LA UNION – Nakabalud itan iti San Fernando City Police Office ti maysa a pulis ken ti asawa daytoy a maibagbaga nga agkakunsabos iti investment scam iti siudad ti San Fernando, La Union.
Nabigbig dagiti akusado a da SPO1 Garry Ancheta, kameng ti nasao nga istasion ti pulsia ken asawana a ni Lanie, agpara a residente ti Barangay San Francisco.
Nakemmeg dagiti agassawa kalpasan nga inyetnag ni San Fernando City Regional Trail Court Branch 66 Judge Victor Conception ti warrant of arrest gapu iti five counts charges ti estafa nga indatag dagiti biktima ti investment scam.
Segun kadagit saan a nainaganan a biktima, napaay dagiti akusado a mangisubli iti kuarta a nagpuonan dagitoy.
Maibagbaga nga inkari dagiti agassawa nga Ancheta nga agdoble ti kuartada iti investment ngem saan daytoy a natungpal.
Naamuan pay manipud kadagiti biktima a nalabit 20 pay a tattao ti naallilaw dagiti akusado ken dumanon iti minilmilion a pisos ti naliksabda.
Iti baet daytoy ket nagkedked dagiti agassawa nga agkomento seknan iti maipabpabasol kadakuada.
Kabayatanna, naamuan manipud iti La Union Police Provincial Office a madama ti imbestigasion ti Internal Affair Service (IAS) ti Police Regional Office-1 ti kaso nga administratibo kontra ken ni Ancheta.
