LA UNION – Nangipeksa iti pannakipagladingit iti liderato ti La Union Police Provincial Office (LUPPO) iti pamilya ti pulis a natay gapu iti panagresponde kalpasan iti naipasamak a panagtambang iti convoy ti agama a mayor ken vice mayor ti Balaoan, La Union.
Iti pannakiuman ti Bombo Radyo kenni C/Ins. Silverio Ordinado Jr., tagapagsarita ti LUPPO, kinunana nga idi kalman ket pimmusay ni SPO3 Villamor Laya kabayatan a daytoy ket maag-agasan idiay ospital gapu iti nilak-amna a sugat iti ulo manipud ti pammaltog dagiti suspek.
Maiturong ti bangkay ni Laya iti pagtaenganda idiay ili ti San Gabriel tapno malamayan.
Sigun pay kenni Ordinado, madama met nga agpapaimbag ti kaddua ni Laya a nagresponde a ni SPO1 Dario Cahigas a naglak-am met iti sugat ti bagina kalpasan a pasabtan iti bala ti paltog manipud kadagiti maipagarup nga assassins ni Balaoan Vice-mayor Al-fred Concepcion.
Immuna iti daytoy, nagresponde dagiti dua a pulis nga agpada nga intelligence officer ti LUPPO tapno iberipika iti report maipapan ti maipagarup a panaglibas dagiti suspek iti napasamak nga ambush idiay ili ti Balaoan.
Idi a makagtengda idiay Barangay Nagsaag, San Juan, La Union ket pinasabtan isuda iti paltog dagiti suspek.
