Pinaglibakan ti Bohol police a karaman dagiti kameng da ti nadungpar a pumpboat idi aldaw ti Biernes, Mayo 2, a nakatayan dagiti dua a mangngalap sadiay Isla Malingin, Bien Unido.
Nabigbig ti biktima nga isuda Rene Reyes Awas ken BJ Manayon, agpada a residente ti nasao nga ili. Naisugod pay ti ospital ni Awas ngem natay metlaeng gapo ti nagun-od na a sugat bayat a napukaw pay ti sumagmamano nga oras ni Manayon a natay met laengen a nasarakan da.
Segun kenni Police Lieutenant Jotham Guminigin, Officer-in-charge ti Bien Unido Municipal Police station, 100% nga impasiguro na iti publiko nga awan ti aniaman a seaborne patrol ti insayangkat dagiti tao da kadagiti aldaw ti Huwebes ken Biernes, a napasamak ti insidente.
Daitoy ti nagbalin a panangilawlawag na kalpasan ti agwarwaras a komento dagiti netizens a police ti makin-aramid ti aksidente. Kinunana nga awanan da kadagiti mobility assets maipapan ti seaborne patrolling. Saan na met a maberipika nu nangaramat ti ilegal a pagkalap dagiti biktima.
Al-allukoyen na ita dagiti adda ammo na ti insidente a makikoordinar kadakuada para iti epektibo nga imbestigasyon.
Nagpanawagan pay ti opisyal iti publiko a liklikan ti agiwaras ti saan a beripikado nga impormasyon, nangruna nu karaman iti tropa da nga immuna na metten a kinuna nga awan iti pakainaigan na ti pasamak.
Iti agdama ket agtultuloy ti imbestigasyon da mainaig ti mapapati a maysa pay a pumpboat a nakadungpar ken nu siasino dagiti nakalubbon iti daitoy.
