LA UNION – Saan a kumbinsido ti pulisya iti ibag-baga dagiti naaresto a tallo a miyembro ti Parojinog Drug Group nga agpas-pasyar da laeng iti Ilocos region.
Iti interview ti Bombo Radyo La Union kenni C/Ins. John Guiagui, hepe ti San Fernando City Police, kinuna na a posible nga agpal-palusot laeng dagiti nakemmeg nga akusado babaen iti panangibaga da nga agpas-pasyar laeng dagitoy.
Segun kenni Guiagui, saan da nga ikkaten iti posibilidad a kadwa wenno ammo dagiti tallo iti lugar a paglem-lemmengan iti wanted a kabsat ni Ozamis City Mayor Reyanoldo Parojinog a ni City Councilor Ricardo “Ardot” Parojinog.
Innayon pay ti opisyal, kadwa dagiti tallo a nakalugan iti maysa a van iti walo pay a tattao a pakaibilangan iti asawa ken dua nga anak iti natiliw nga akusado a ni June Francisco.
Mabalin met kunana nga ar-aramaten dagiti tallo dagiti ubbing tapno pagparangen nga agpas-pasyar dagitoy tapno saan a nakakad-kadlaw a sap-sapolen ida dagiti otoridad.
Kabayatanna, lalo pay a nagirut iti seguridad ti pulisya iti panangbantay kada June ken nagannak na nga isuda Ozamis City Councilor Rizalina ken Manuelito Francisco.
