LA UNION – Im-imbestigaran ita ti pulisya no adda ti pakainaigan iti nagsaruno nga insidente iti pammaltog ti riding in tandem suspects idiay Barangay Cabaroan, ili ti San Juan, La Union.
Iti pannakiuman ti Bombo Radyo kenni S/Supt. Ricardo Layug Jr., Provincial Director ti La Union Police Provincial Office (LUPPO), kinunana a ti immuna nga insidente ti pammaltog idi Sabado a nakatayan iti 64-anyos a lolo a ni Reynaldo Bacani ket addan ti natukoy a “person of interest” base ti salaysay ti maipagrup a nakaimatang iti krimen.
Intudo ti testigo iti ladawan ti maysa a lalaki nga adda iti police gallery nga isu ti posible a responsable iti pammaltog.
Saan met nga innaganan ni S/Supt. Layug ti natukoy a person of interest, ngem iti laengen nakunana ket addaan daytoy iti adu a nakairamanan a kaso.
Kabayatanna, iti pakainaigan ti iligal a droga met iti maysa kadagiti kangrunaan a motibo iti pulisya maipapan ti pammaltog iti nasao met laeng a barangay idi kalman ti 33-anyos a high value target (HVT) drug personality a ni Franklin Benson Perez wenno alyas Benson Flores.
Sigun pay kenni S/Supt. Layug, ur-urayenda laengen iti resulta ti cross matching kadagiti naala a basyo ti bala idiay crime scene tapno maammuan no maymaysa a grupo dagiti suspek iti immatake iti nadakamat a lugar.
Nangnayon metten ti LUPPO iti nasao nga ili tapno mangipaay ti seguridad ken tumulong iti imbestigasyon iti nagsasaruno nga insidente ti pammaltog.
