BR LA UNION – Kagiddan iti panagsagana ti Department of Interior and Local Government (DILG) para iti posible a pannakaibalud dagiti karaman iti flood control scandal, siniguro ni Interior Secretary Jonvic Remulla nga awan ti maipaay nga special treatment iti uray siasino a mabalud.
Impaganetget ni Remulla, siasinuman a mabalud gapu iti flood control scandal ket kasapolan nga agtitipon iti uneg ti selda, anyaman ti estado dagitoy iti biag.
Idi kalman, Oct. 20, ket nangisayangkat ti inspection iti sekretaryo iti New Quezon City Jail idiay Payatas kas panagsagana para iti posible a panagadu ti bilang dagiti balud gapu iti nasao nga iskandalo.
Iti interview ita nga aldaw, inlawlawag ni Remulla a ti nasao a pasilidad ket nabayagen a naipasdek ngem nabiit pay a nalpas iti Phase 3 a kangrunaan a maisag-sagana para kadagiti karaman a nagnumar iti flood control scandal.
Iti inisyal nga inspection, ma-akomodar ti 10 nga indibidwal ti tunggal selda.
Bakante ti 21 agingga 22 a selda tapno adda sida-da-an a mausar wenno kaibatugan daytoy ti nasurok 200 a preso.
Nupay kasta, nu ad-adu kunana ngem 200 iti mabalud, kabaelan latta ti pasilidad nga umawat ti agingga 800 a tattao.
Plano ti DILG a pagtitiponen dagiti preso iti selda, mailaksid iti kasasaad ti biag dagitoy.
Kayatna sawen, mabalin nga agkadwa iti uneg ti selda ti maysa a senador, contractor, congressman, ken dadduma pay, nu kaspangarigan maimandar iti temporaryo a panangibalud dagitoy bayat a madeng-dengngeg ti kaso.
Segun pay kenni Remulla, agpapada a propesyunal dagiti miyembro ti Bureau of Jail Management and Penology a mangipaay ti umno ken patas a serbisyo kadagiti adda iti uneg ti pagbaludan.
