Indauloan dagiti nangangato nga opisyales ti gobierno ti inspeksyon ti Tripa de Gallina pumping station idiay ciudad ti Pasay kas paset ti nainget nga addang ti administrayon kontra ti panaglayus idiay Metro Manila.
Dimmar-ay ti nasao nga akditibidad da Transportation Secretary Vince Dizon, Budget Secretary Amenah Pangandaman, Information and Communications Technology Secretary Henry Aguda, MMDA Chairman Atty. Romando Artes, ken Pasay City Mayor Emi Calixto.
Kasaruno ti panagbisita iti lugar ket naiyuswat dagiti umuna a paset ti Flood Control Project (FCP) a nairanta a mangpapigsa ti kapasidad dagiti pumping stations ken drainage systems kadagiti flood-prone areas.
Maysa kadagiti tampok iti aktibidad ket ti ceremonial signing ti Memorandum of Understanding para ti Digital Information for Monitoring and Evaluation (DIME), inisyatiba mangipakaammo kadagiti digital tools para ti real-time monitoring iti flood control infrastructure.
Pagaammo ti Tripa De Gallina pumping station a kangrunaan a pasilidad idiay Pasay a mangtamtaming ti panaglayus nangruna nu panagtutudo. Idi napalabas a tawen ket nagbalin a karit para ti Metro Manila ti napartak a panagngato ti lebel ti danum nga ingubuay ti napigsa a tudo, urban congestion, ken kinakurang ti drainage maintenance.
Babaen ti FCP ken DIME, panggep ti gobierno a mapasayaat pay ti disaster preparedness, mapapartak ti response time, ken masiguro iti transparency para ti implementasyon kadagiti flood mitigation measures.
Daitoy a proyekto ket mangusar ti digital technology para iti epektibo a monitoring kadagiti pumping stations, papigsaen ti koordinasyon dagiti ahensya ti panagsungbat kadagiti emergency, ken mangipaay ti data-driven evaluation para ti nasaysayaat a panangimaton ti pondo ken proyekto.
Paset ti programa ti nalawlawa nga addang iti administrasyon para ti climate resilience ken disaster risk reduction a panggep a salakniban dagiti komunidad idiay Metro Manila ken dadduma pay a lugar a masansan a biktima ti panaglayus.
