BR LA UNION – Dinayyeg ti magnitude 5.6 a gingined iti kabaybayan asideg idiay Jomalig, Quezon itay alas 10:11 ti rabii, Hulyo 29, segun iti Philippine Institute of Volcanology and Seismology (PHIVOLCS).
Nailista ti gingined iti kauneg a 10 kilometro ken nasaknap a narikna iti nagduduma a paset ti Luzon, pakairamanan idiay Metro Manila, Rizal, Quezon, Bulacan, Pampanga, Cavite, Laguna, Camarines Norte, Camarines Sur, ken asideg a lugar.
Nailista met ti Intensity III idiay Quezon City.
Kabayatanna, iti instrumental intensity report ti PHIVOLCS, nakapadas ti Intensity III iti Jose Panganiban ken Mercedes idiay Camarines Norte, kasta metten iti Guinayangan ken Infanta idiay Quezon.
Bayat nga Intensity II idiay Ragay, Iriga City, Pili, Sipocot, ken Sagnay, Camarines Sur.
Iti agdama, awan ti naipadamag a perdisyon seknan iti narikna a panagdayyeg.
