Maipasango iti kabaruan nga imbestigasion iti R&B singer a ni R. Kelly.
Daytoy ket gapu iti phone number ti retirado a warden ti federal lockup-na idiay North Carolina.
Segun ti abogadona a ni Beau Brindley, nangrugi iti problema idi nairaman daytoy iti mentor program a tumultulong a mangiwanwan kadagiti sumagmamano nga inmates.
Maipagarup a nakabantay idi ti warden ken imbati iti numero a mabalin a maawagan no adda dagiti sumagmamano nga inmates nga agtarigagay a dumawat ti balakad.
Ngem natiliwan isuna dagiti padana nga inmates nga addaan ti selpon a maiparit iti pagbaludan.
Iti inaramid a panagsukisok dagiti otoridad ket nakitada iti kuaderno ti kumakanta a nakaisuratan ti numero ti retirado a warden.
Gapu iti insidente ket naikabil ni Kelly iti Special Housing Unit kabayatan ti panagimbistigar dagiti otoridad.
Idi 2021, nasentensiaan ti 30 tawen a pannakaibalud ni Kelly idiay New York gapu iti kaso a racketeering, bribery, illegal sex kadagiti menor de edad, ken sumagmamano a federal offenses.###
