BR LA UNION – Naan-anayen a linteg iti gakat a mangipaay ti bileg iti presidente ti pagilian a kissayan wenno suspindiren ti excise tax iti langis.
Daytoy ket kalpasan a pirmaan ni Presidente Ferdinand Marcos Jr. iti Republic Act No. 12316.
Iti sidong ti linteg, maipaayan ti presidente ti emergency powers a suspindiren wenno kissayan iti excise tax dagiti produkto a petrolyo, maibasar iti rekomendasyon ti Development Budget Coordination Committee (DBCC) iti tulong ti sekretaryo ti Department of Energy.
Mabalin nga usaren iti nasao a bileg nu umabot wenno lumbes iti 80 dolyar kada bariles iti presyo ti krudo iti sangalubongan a merkado iti uneg ti maysa a bulan.
Maibasar iti linteg, ti panangsuspinder wenno panang-kissay ti buwis ket mabalin nga ipatungpal kadagiti espesipiko a produkto a petrolyo.
Mabalin nga aramiden a sibubukel wenno apagapaman a panagkissay ti excise tax, depende iti agdama a kondisyon iti ekonomiya ken presyo ti langis.
Nailawlawag pay a ti panangipatungpal ti suspension wenno kissay iti excise tax ket saan a rumbeng a lumbes iti tallo a bulan iti uneg ti maysa a tawen.
Paset daytoy iti addang ti gobiyerno tapno mapalag-an iti epekto ti agtultuloy a panagngato ti presyo ti langis kadagiti umili, partikular iti pamasahe, presyo dagiti gagatangen, ken gastos iti transportasyon.
Agbalin nga epektibo ti linteg, 15 nga aldaw kalpasan a maipablaak iti Official Gazette wenno iti maysa a warnakan nga addaan ti nalawa a sirkulasyon.
