BR LA UNION – Tinakderan ni Atty. Raymund Palad nga adda umdas nga ebidensiya-na a mangpaneknek a ti kliyentena a ni Ramil Madriaga ket nagtrabaho kenni VP Sara Duterte.
Impaganetget ti beterano nga abogado a kabaelanda a paneknekan iti korte wenno aniaman a board, a nagtrabaho ken nag-suweldo ti dakkel ni Madriaga iti sidong ti panagtrabaho na kenni VP Sara .
Kinapudno na kunana, umabot iti P100,000 agingga P150,000 kada bulan iti maipagarop nga aw-awaten idi ni Madriaga a suweldo manipud iti pamilya Duterte.
Malaksid pay iti sumagmamano a cash a mait-ited kenkuana gapu iti nagduduma a rason.
Inlawlawag ti abogado, a nagduma iti sigud a trabaho ni Madriaga sakbay a simrek iti pamilya Duterte .
Nagtrabaho ni Madriga iti pamilya Duterte kas securty consultant, intelligence operator, ken dadduma pay.
Aminado iti abogado nga idi adda pay laeng iti sidong ti pamilya Duterte ni Madriaga ket aglap-lapusanan iti impa-iggem ken impaay da kenkuana.
Kas pammaneknek, adu dagiti dokumento nga iggem ni Ramil a mangipak-pakita kadagiti naawat na a kuwarta, nga idi agangay ket nangted kenkuana ti nagarbo a panagbiag, nagserbi a dalan tapno makagatang iti milyones a balor ti lug-lugan ken dadduma pay.
Impaganetget ni Palad, saan laeng nga iti impeachment hearing a nakasagana da nga irwar daytoy ngem uray pay iti korte ditoy pagilian.
