Kinondenar ti International Committee of the Red Cross (ICRC) ti panag-massacre ti Israel kadagiti Palestinian medics idiay Gaza.
Segun iti grupo, ti nasao nga insidente ket mangipakpakita laeng nu kasatno a kadelikado iti Gaza Strip para kadagiti sibilyan, nga uray dagiti humanitarian workers a tumulong para iti panangsalaknib iti biag ti umili sadiay ket target metlaeng iti pammapatay.
Idi napalabas a bulan ket dumanonen ti agingga 15 a medical ken humanitarian aid workers ti pimmusay sadiay Rafah bayat a nakalugan da iti ambulansya a tumulong kuma kadagiti nadundunor a residente.
Immuna metten a kinuna ti United Nations nga arig na nagbalinen a “killing field” iti Gaza agsipud ta saan met a paspastreken ti Israel dagiti trucks a mangited kadagiti supply kas iti taraon ken agas.
Maipalagip a tuloy-tuloy ti inaramid a panagraut ti Israel idiay Gaza agingga naan-anay a wayawayaan ti Hamas dagiti iggem da a kautibo.
