Positibo iti red tide toxins dagiti dua nga coastal towns ti Pangasinan kas maibasar ti latest laboratory analysis nga inruar ti Bureau of Fisheries and Aquatic Resources (BFAR).
Dagitoy ket dagiti ili ti Bolinao ken Anda nga agpada a nakasango iti Lingayen Gulf.
Babaen ti maysa nga surat manipud kenni BFAR Region 1 Director Rosario Segundina Gaerlan kenni Pangasinan Governor Ramon Guico III, nakailanad a dagiti shellfish meat sample a nakolekta manipud kadagiti kabaybayan ti Bolinao ken Anda ket nagpositibo iti red tide toxins.
Gapo iti dayta ket ipawpawil ti BFAR kadagiti residente ken mangngalap iti panagkolekta, panaglako, ken panangkaan kadagiti shelfish ken dagiti armang gapo iti pangta nga igubuay ti red tide iti salun-at ti tao.
Dagiti dua nga ili ket nasurok-kumurang 100km ti kaadayo na manipud Dagupan City, pagaammo kas ‘Bangus Capital of the Philippines’ ken kangrunaan a supplier ti bangus ti dakkel a paset ti Pilipinas.
Immuna metten a nangiruar ti Pangasinan Provincial Disaster Risk Reduction and Management Office iti red tide alert tapno maalerto ti publiko mainaig ti natakuatan iti panagadal ti BFAR.
