BR LA UNION – Ballaygi ti naisayangkat a Regional Fisheries and Aquatic Resources Management Council Congress 2025 idi kalman, Setyembre 29, 2025 ditoy siyudad ti San Fernando.
Dinar-ayan daytoy dagiti mangibagbagi manipud iti uppat a probinsiya ti rehiyon uno a pakaibilangan ti Ilocos Norte, Ilocos Sur, La Union, ken Pangasinan.
Segun kenni City Fisheries and Aquatic Resources Management Council (CFARMC) Chairman ti San Fernando City, La Union a ni Gavina Tumbaga, naisayangkat ti nagduduma nga aktibidad a nairanta a mangpa-pigsa iti panagtitinnulong para iti nadur-as a panagkalap ken mang-protektar iti kabaybayan para iti sumarsaruno a henerasyon.
Iti City Fisheries and Aquatic Resources Management Council ti San Fernando ket paset ti Task Force Sagip Karagatan, maysa nga inter-agency initiative a mangisay-sayangkat ti regular nga operasyon kontra illegal fishing, ureported ken unregulated fishing.
Impaganetget ni Tumbaga a napateg ti nasao a ganwat tapno mapreserba dagiti marine resources wenno gameng iti kabaybayan.
Tumultulong ti nasao a konseho iti panagputar iti ordinansa ken allagaden para kadagiti mangngalap ken para iti nasao a klase ti pagbiagan, tapno mataginayon daytoy ken magun-od ti sustainability ken food security ditoy probinsiya ken intero a rehiyon uno.
