BR LA UNION – Agtultuloy iti panngallukoy ti Department of Agriculture Regional Field Office 1 (DA-RFO1) kadagiti mannalon ken mangngalap nga agparehistro iti Registry System for Basic Sectors in Agriculture wenno RSBSA.
Iti RSBSA ket maysa nga entry of registration system ti ahensiya para kadagiti mannalon, mangngalap ken dadduma pay a sakopen ti sektor ti agrikultura tapno maiyasideg kadakuada iti naduma-duma a serbisyo ti nasao nga ahensiya.
Segun kenni Doris Joy Garcia, Project Evaluation Officer V ti Department of Agriculture RFO1, importante nga agbalin a miyembro dagiti adda iti sektor ti agrikultura tapno mabenipisyaran ti amin a serbisyo ti ahensiya, kas koma dagiti maipapaay a subsidiya, makaala ti loan, ken naduma-duma a tulong.
Binalakadan ni Garcia dagiti maseknan nga agturong kadagiti Municipal Agriculture Office (MAO) para iti umiso nga addang nga aramiden, nu kuwalipikado nga agpa-rehistro ken agbalin a miyembro ti RSBSA, tapno maka-avail kadagiti tulong nga ipapaay ti gobyerno.
