Pagpalpalawagen ni House Committee on Dangerous Drugs Chair ken Las Pinas Rep. Mark Anthony Santos dagiti maseknan nga ahensia ti gobierno a lawlawagan ti araramidenda a panangmonitor kadagiti persons of interest a mainaig iti drug investigation iti Laos, ken kiniddawna ti panangisubmitir ti beripikado a report iti Committee.
Iti panagdengngeg ti Komite idi Huebes, sinaludsod ni Santos no adda ti agdama nga hold departure order kontra kadagiti indibidual a nainaig iti kaso ken no bantayan ida ti Philippine National Police (PNP) ken ti Philippine Drug Enforcement Agency (PDEA).
Segun iti pannakabagi ti Bureau of Immigration (BI), dagiti indibidual a nainaganan mainaig iti kaso ket naipasidongen iti alert status.
Inlawlawag ti Bureau of Immigration a no padasenda ti rummuar ditoy pagilian ket makiuman ti ahensia iti PNP ken PDEA.
Karaman kadagiti maimimbestigaran ket ti pannakakumpiskar ti 521 kilos ti mapapati a shabu iti Luang Prabang International Airport sadiay Laos idi Oktubre 1.
Kiniddaw pay ti komite ti nalawlawag a koordinasion dagiti ahensia ken rekomendasion para kadagiti posible a linteg, pondo ken kanayonan nga alikamen tapno mapapigsa ti laban kontra iti illegal a droga.
