Kinondenar ken inyebkas ni House Assistant Majority Leader ken Zambales Representative Jay Khonghun ti pungtot na maipapan iti kaadda ti “monster ship” ti China iti taaw asideg ti Zambales.
Inawagan ni Khonghun ti panagtignay ti “monster ship” a makapadanag a display of aggression ken pannakibiang ti China iti teritorio ti Pilipinas, partikular iti exclusive economic zone (EEZ).
Segun ken ni Khonghun daytoy ket nalabes nga agresion, ken awan ti karbengan ti China a sumrek iti teritorio ti pagilian.
Kinuna ti Kongresista a ti nasao a barko ket simbolo ti bullying a saan a rumbeng nga ikankano ti Pilipinas gapu ta ti inaramidda ket nalawag a panaglabsing iti international law ken maikontra iti kinasoberano.
Patien ti mammanday-linteg a saan laeng a pangta iti teritorio ti kastoy a klase ti panagtignay no di ket karaman ti seguridad ken pagbiagan dagiti lokal a mangngalap.
Inapelana kadagiti umili a Pilipino, nangruna kadagiti kailianna, a saan nga agbuteng iti ar-aramiden ti China.
Kinunana a kasapulan nga ipakita ti Pilipinas iti lubong a kabaelantayo nga ilaban ti karbengantayo babaen ti United Nations Convention on the Law of the Sea wenno UNCLOS.
Inawagan ni Khonghun ti Philippine Coast Guard (PCG) ken Armed Forces of the Philippines (AFP) a mangpapigsa iti presensiada iti nadakamat a taaw.
Indagadagna pay iti Department of Foreign Affairs (DFA) a mangipila iti sabali pay a diplomatic protest maibusor iti China.
Impaganetget ti mammanday-linteg ti kinapateg ti pannakapapigsa ti relasion ti Pilipinas kadagiti kaaliado a pagilian ken rumbeng nga agtignay iti ar-aramiden a maulit-ulit nga panagabuso.
