BR LA UNION – Imbasura ti Korte Suprema dagiti petisyon da Atty. Vic Rodriguez, Berteni Cataluña Causing ken Atty. Ernesto Francisco Jr. kontra iti baro a ‘voting threshold’ ti Senate Impeachment Court.
Dagiti petisyon ti mangkuwes-kuwestiyon iti nagbalin nga interpretasyon ti Senado iti kasapolan a ‘two-thirds vote’ tapno maaddaan ti ‘conviction’ iti maysa nga ‘impeachment case’.
Idi Setyembre 23, napagnumwan ti Senado nga dagiti laeng ‘legally’ ken ‘actually able to participate’ iti panagdengngeg iti rumbeng nga agbotos.
Ngem kayat nga ipawaswas daytoy da sigud nga Executive Secretary Vic Rodriguez ken Atty. Ernesto Francisco iti Korte Suprema.
Impaganetget met ni Berteni Cataluña Causing a rumbeng a mabilang latta iti binnotosan iti dadduma a senador nga uray aglem-lemmeng, nakadetene wenno addaan ti medikal a pagkasapolan.
Nupay kasta, imbasura ti Korte Suprema iti nagsisina a petisyon, ken imbaga na nga awan ti naan-anay nga ‘standing’ ken ‘premature’ dagitoy.
