Inawagan ni house assistant majority leader a ni Jay Khonghun manipud Zambales dagiti botante a saan a mangibotos kadagiti kandidato a pabor iti interes ti China.
Namakdaar ni Khonghun a ti panagpili dagiti kandidato a pro-China ket mabalin a mangikompromiso iti kinasoberano ti pagilian, iti tengnga ti ilegal nga iseserrek ti China idiay West Philippine Sea (WPS).
Kinuna ni Khonghun, chairman ti House Special Committee on Bases Conversion, a ti kaudian a surbey ket mangipakita nga umad-adu dagiti Pilipino a bumusbusor kadagiti agresibo nga addang ti China kadagiti kabaybayan ti Pilipinas.
Segun kadagiti resulta ti Pulse Asia Survey nga inkomision ti Stratbase ADR Institute, 73% kadagiti Pilipino ti saan a mangsuporta kadagiti kandidato a maibilang a pro-China, maysa a panangiyebkas ti nasaknap a panangmatmat iti kaawan panagtalek ti China.
Kasta met, ngaimpakita ti Octa Research Survey idi Marso 2024 a 76% kadagiti Pilipino ti mamati a ti China ti kadakkelan a pangta iti pagilian, a mangipakpakita iti dakkel a pannakaseknan maipapan iti teritorial integrity ken national security.
Innayonna a napateg a pilien ti Pilipino dagiti lider a mangidepensa kadagiti mangngalap ken kadagiti ilegal nga aktibidad idiay West Philippine Sea.
Impunto ni Khonghun ti kinapateg ti natalged ken kolektibo a tignay a maibusor iti foreign aggression, iti isu met laeng a tiempo ket nangipalagip kadagiti botante a dagiti desisyon iti eleksion ket mangporma iti masakbayan ti pagilian.
