Indagadag ti Marikina City Representative a ni Stella Quimbo iti Philippine Health Insurance Corporation (PhilHealth) nga aramiden ti singasing ni Speaker Ferdinand Martin Romualdez a sipapasnek tapno maipatungpal ti maysa a moratorium iti Premium Contribution Collection iti tengnga ti kangrunaan a sobra a pondo ti ahensya.
Impalagip ni Quimbo a kas maysa a social health insurance program, saan koma a panggep ti PhilHealth ti makagun-od iti kuarta no di ket mangipaay kadagiti kadakkelan a benepisio para kadagiti miembrona.
Insungbat pay ni Department of Health Assistant Secretary Albert Domingo a Zero iti ganansya ti maysa a social health insurance program.
Binabalaw ni Quimbo ti pagkwarkwartaan ti PhilHealth ken kuestionaranna ti rason ti agtultuloy a panagkolekta iti premium iti laksid ti dakkel a reserve fund.
Inlawlawag ni Domingo a tapno saan a masayang ti danom ket iddepen ti gripo.
Iti report ni PhilHealth Senior Vice President Israel Pargas, agparparang a nakakolekta ti ahensia iti dandani P195 billion manipud iti direct premiums idi napan a tawen.
Iti laksid ti manamnama a panagngato ti gastos iti benepisio inton 2025, napaliiw ni Quimbo a nagtalinaed a natalged ti pinansial a kasasaad ti PhilHealth.
Nagbuteng pay ti mammanday-linteg iti kabaelan ti Philhealth a mangusar iti pondo ken kinuestionaranna pay ti basaran a naaramat iti panangikeddeng iti premium rate.
Immuna met a pinasingkedan ni Nerissa Santiago ti Philhealth a nangtangdan ti opisina iti consultant para iti 2024 valuation, ngem awan ti naipadamag a napateg a natakuatan.
Iti pannakadengngeg ti kaso, dinamag ni Quimbo kadagiti opisial ti PhilHealth no napanunot ti ahensia a pababaen dagiti premium gapu iti kinaadu da.
Inadmitir ni PhilHealth President ken CEO Emmanuel Ledesma Junior a saan a napagsasaritaan iti dayta.
Innayonna a ti estruktura ti pondo ti PhilHealth, nga aggapu iti Sin Tax ket mangpatpataud iti dumakdakkel a pondo a mabalin a saan a maibagay kadagiti pudno a kasapulan ti salun-at dagiti miembro.
Napagsasaritaan met no ania ti maar-aramid kadagiti kontribusion a saan a mausar.
Inlawlawag ni Domingo nga pay as you go system wenno arig na pinnalawa ti sistema a maus-usar no saanka a masaksakit iti agdama et rumbeng nga usaren dayta ti sabali.
Impamaysa met ni Quimbo ti saan a panagtunos ti panagkolekta ken panagpondo.
Inulit na a rumbeng nga ipangpangruna ti PhilHealth ti pagimbagan dagiti miembro ken siguraduen a dagiti kontribusion ket nagbanag iti konkreto a benepisio.
