BR LA UNION – Timpuar ti nabara nga argumento iti House plenary iti nagbaetan da Caloocan Rep. Egay Erice ken Iloilo Rep. Janette Garin kalpasan a kwinestiyon ni Erice ti maipagarop a pannakibiang ni Majority Leader Sandro Marcos kadagiti deliberasyon.
Segun kenni Erice, saan a maipakita ti pudno nga espiritu ti minority bloc gaputa arigna un-unaan ti majority iti proseso, partikular iti isyu ti substitute bill para iti Anti-Political Dynasty.
Dagus a simmungbat ni Garin ket impapilitna a saan nga aramiden a personal dagiti deliberasyon, ken ti tarigagay ti majority ket tapno masigurado ti naannayas a taray dagiti singasing.
Naukag pay ti pannakadutok ni Erice, a maipagarop a base iti singasing ti sigud a lehislador iti maika-19 a Kongreso.
Pinalotpot ti Lady Solon no apay nga agpad-padiktar ti minorya iti sigud a mammanday linteg.
Inakusaran met ni Erice ni Garin nga agsasao para kenkuana.
Nupay kasta, inlawlawag ni Garin a nagsalodsod laeng ti categorical questions tapno direkta a masungbatan ti sigud nga opisyal ti minorya.
Napasamak ti panag-rikkiar dagiti dua a kongresista, sumagmamano nga aldaw kalpasan a naikkat ni Erice kas senior deputy minority leader ken sinukatan ni Rep. Leila de Lima, gaputi panangkontra na iti nadakamat a substitute bill.
