BR LA UNION – Uppat ti natay a pakairamanan ti dua a suldado bayat a 12 dagiti nadundunor iti timpuar a rinnupak iti baetan dagiti suldado ken Moro Islamic Liberation Front (MILF) idiay Sumisip, Basilan.
Segun kenni Brig. Gen. Alvin Luzon, commander ti 101st Infantry Brigade ti Phil. Army, napasamak ti rinnupak alas 4:00 ti malem idi Miyerkoles, Enero 22, idiay Barangay Lower Cabengbeng ti nasao nga ili.
Dagiti natay ken nasugatan a suldado ket kameng ti 32nd Infantry Battalion ti Phil. Army.
Dagiti nasugatan ket dagus a naiturong idiay Lamitan City District Hospital ngem naiyakar iti Camp Navarro General Hospital iti nasao met laeng a siyudad.
Innayon ni Luzon, ti tropa ket mangipapaay ti seguridad para iti grupo ti United Nations Development Programme (UNDP) a mangisay-sayangkat ti peace and development project iti nasao nga ili, idi kellaat a timpuar ti MILF group nga indaulwan da Najal Buena ken Oman Hajal Jalis.
Dagiti nasao nga indibiduwal ket nalatak a notoryus iti bayolente a family conflict wenno rido iti nasao a lugar.
Inuram pay dagiti lawless elements iti KM450 military vehicle.
Iti inaramid a panagraut ti MILF ket maipagarop a suportado ti sumagmamano a miyembro a mangitantandudo ti kapya ken talna iti nasao a lugar.
