Dismayado ni Northern Samar 1st District Representative Niko Raul Daza iti nagbalin a wagas ti media ti interpretasyon da iti “Kuratsa,” maysa a tradisyunal a sala a ti Waray a nagtaud idiay Samar ken Leyte.
Impaganetget na a ti Kuratsa nasursurok pay ngem iti simple a panagpabuya ken maysa a napateg nga elemento ti pakabigbigan dagiti Samarnon ken Leyteño a simbolo ti pakasaritaan, pammati, ken tradisyon da.
Inlawlawag na a ti tradisyon a panangipurwak ti kwarta kabayatan ti panagsala ti Kuratsa ket saan rumbeng a maibilang a panagsayang nu di ket panagpakita ti kinababa, panagparabor, pakaseknan iti sabali a tao, bendisyon, ken pagragsakan pay para kadagiti dadduma.
Segun kenni Daza, kadawyan a dagiti maurnong a kwarta ket mapmapan ken maigasgastar para ti pagkasapulan ti komunidad.
Maus-usar daitoy para iti panangpondo kadagiti proyekto a nairanta tapno mapasayaat ti kabibiag dagiti tattao ken papigsaen ti panagdadanggay. Babaen ti kastoy a wagas ket saan laeng a panagselebrar ti kultura iti pakaibatogan ti Kuratsa nu di ket maysa pay a gundaway nga agserbi iti pada a tao.
Gapo iti insidente ket nagpanawagan ni Daza kadagiti sabali pay a media groups nga agbalin a naannad ken responsable kadagiti ipadpadamag da, nangruna nu adda pakainaigan na iti kultura ken tradisyon. Pinaregta na met iti panangisayangkat pay nga umuna kadagiti panagadal wenno agpakonsulta kadagiti eksperto tapno maliklikan iti biddut nga interpretasyon ken sensationalized news.
