Impunto ti National Task Force to End Local Communist Armed Conflict (NTF-ELCAC) nga ipakpakita ti resulta ti kallabes a 2025 midterm elections ti panagkontra dagiti botante kadagiti party-list nga adda pakainaigan na kadagiti Communist Party of the Philippines – New People’s Army – National Democratic Front wenno CPP-NPA-NDF.
Segun kenni NTF-ELCAC Executive Director Undersecretary Ernesto Torres Jr., rumrumuar iti pre-canvass figures a sakop ti nasurok 95% kadagiti presinto a nagtennag ti 26% ti botos para kadagiti CPP-NPA-NDF-affiliated party-lists nu idasig ti resulta idi napalabas nga 2022 Presidential Elections.
Nalawag kunana a saanen a magustuan dagiti Pilipino ti panangallilaw dagiti nasao nga indibidwal ken party-list organizations mainaig kadagiti koneksiyon dagiti komunista nga rebelde a grupo.
Ti las-ud ti sumagmamano a tawen, nagkedked dagitoy a kondenaren dagiti bayolente nga armado nga insurhensiya ti nasao a grupo ken itan ket pinagsungbat dagiti botante babaen ti panagbassit ti tiyansa da nga agtugaw idiay Kongreso.
Imbatad pay ti NTF-ELCAC official a saanen a nakaskasdaaw nga us-usaren dagiti party-lists ti mapapati a panagred-tag kas pangdepensa iti pannakadismaya ti resulta ti eleksyon.
Kinunana, tinagibassit da iti kapasidad dagiti botante a Pilipino a timbangen ti kinapudno. Innayon pay ti opisyal a nangaramid dagiti umili a Pilipino ti maysa a natalino a panagpili ken dinusa da ti panangallilaw, saan a babaen ti aktibismo.
Kabayatanna, pinagyamanan met ti anti-insurgency task force dagiti botante iti kallabes nga eleksyon iti pammaneknek a maisurat latta ti masakbayan ti pagilian, usar dagiti balota ken saan a babaen ti bala wenno kinaranggas.
