BR LA UNION – Posible a bumaba iti P80/kilo ti retail price ti sibuyas iti merkado, kagiddan ti isasangpet dagiti imported onion manipud China, maibasar ti patta-patta ti Department of Agriculture(DA).
Segun kenni DA spokesperson Assistant Secretary Arnel De Mesa, posible a marikna iti naan-anay a panagbaba ti presyo ti sibuyas iti uneg ti dua a lawas .
Manipud iti sigud a P180 agingga P200 kada kilo nga agdama a presyuan, posible kunana a bumaba daytoy iti P80 agingga P100 kada kilo, a simrek iti target price range.
Segun iti Bureau of Plant Industry (BPI), iti laeng 459 metric tons (MT) a red onion pay laeng manipud iti nasurok 3,000 MT nga inangkat ti sumangpet ditoy Pilipinas.
Iti puraw a sibuyas, iti laeng 200 MT manipud iti nasurok 1,000 MT nga order ti sumangpet.
Segun kenni De Mesa, in-inut a ngumato iti supply ti sibuyas iti merkado manipud kadagiti sumangpet nga imported, agraman ti dackel a bulto ti local supply kagiddan ti panag-aapit.
Iti likudan daytoy, agtaltalinaed a nangato iti presyo ti sibuyas iti merkado nangruna idiay Metro Manila nga agay-ayam pay laeng iti P140 agingga P240 kada kilo iti presyo ti nalabagga a sibuyas bayat a P90 agingga P150 iti kada kilo ti presyo ti puraw a sibuyas.
Immunan nga immandar ni DA Sec. Francisco Laurel Jr. iti panangisayangkat ti inspection iti cold storage facilities tapno madetermina nu adda dagiti agilem-lemmeng ti stock a sibuyas, tapno i-manipula iti presyo iti merkado.
