Nagpanawagan ni Senador Benigno “Bam” Aquino iti nainget a panagadal ti panaggastar ti Department of Public Works and Highways (DPWH) ti aganay P360B a pondo para kadagiti flood control projects ita a tawen, iti kangitingitan paylaeng ti problema ti panaglayos kadagiti adu a paset ti pagilian.
Babaen ti impila na a resolusyon ket inallukoy ni Aquino dagiti komite ti Senado a mangisayangkat ti imbestigasyon tapno madakamat nu epektibo metlaeng dagiti proyekto nga inaramid ti DPWH ken nu nagastar metlaeng a nasayaat ti pondo ti pagilian.
Segun iti mamanday-linteg, manipud 2009 agingga 2024 ket dimmanonen ti P1.47-T ti pakabuklan a gatad iti flood control budget ngem arig na awan serserbi na agsipud ta agtaltalinaed latta a malaylayos ti adu a komunidad.
Malaksid iti resolusyon ket timpuar pay dagiti damag seknan dagiti peke nga flood control projects a pinaboran dagiti napili a contractors.
Iti maysa a naisina nga imbestigasyon ti Senate Blue Ribbon Committee, nadakamat met ti agingga P100B a gatad ti proyekto a posible nga adda iti anomalya na, pakairamanan dagiti proyekto a saan a narugian, saan a naileppas, saan a kasapulan, ken naulit-ulit kadagiti agpapada a lugar.
Impaganetget ni Aquino ti kinapateg ti transparency ken accountability iti panaggastar ti pondo, nangruna ta ti epekto ti panaglayus ket direkta a marikna dagiti umili – manipud pannakadadael dagiti sanikua agingga pannakapukaw ti biag.
Kabayatanna, manamnama met a madakamat ti Senado ti nasao a resolusyon inton sumaruno a sesyon bayat agtultuloy ti panagtudo ken panaglayos ti dakkel a paset ti pagilian.
