ROSARIO, LA UNION – Nagpalagip iti Rosario Municipal Police Station kadagiti motorista maipanggep kadagiti wagas tapno maliklikan iti motornapping.
Segun kadakuada, napateg a masigurado a naka-lock iti aruangan ti lugan ken iserra dagiti tawa uray to ibati ti agpagbiit. Napateg met iti panagparada kadagiti nalawag ken natao lugar, kas kadagiti naipasdek a parking area wenno dagiti lugar nga addaan ti surveillance camera.
Palagip pay iti publiko a saan nga ibati dagiti napateg a gamit kas iti laptop, cellphone, ken bag iti uneg ti lugan. Nasaysayaat no maidanon wenno maiyawid dagitoy tapno saan a maengganyo dagiti agtatakaw.
Inyirekomenda pay ti panagaramat kadagiti anti-theft devices kas iti steering wheel lock, wheel clamp, ken car alarm tapno maliklikan dagiti posible nga agtakaw.
Makatulong iti panag-install ti GPS tracking system iti lugan tapno mabiit a masapul no matakaw.
Kabayatanna, innayunan ti pulisya iti panangipalagip iti publiko a kanayon nga agbalin a naannad ken mapagmatyag tapno mapagtalinaed ti kinatalged dagiti luganda. (Report by Bombo Jordan)
