BR LA UNION – Agtal-talinaed a naka-ulimek ti aktres a ni Ruffa Gutierrez seknan iti guilty verdict kontra iti nobyona nga aktor ken sigud a Quezon City Mayor a ni Herbert Bautista.
Kinedngan ti Sandiganbayan a guilty iti graft wenno panag-kunniber ni Bautista ken ti sigud a city administrator a ni Aldrin Cuña.
Nagramot ti kaso idi nangipalospos ni Bautista iti P32.107 milion a pakadagupan a bayad iti maysa nga Information Technology firm para iti panaggatang kadagiti online occupation permitting ken tracking systems idi 2019.
Simrek ni Bautista iti maysa a kontrata, ket inaprubaranna iti pannakaipalospos ti pakabuklan a bayad idinto a saan pay a naited ti proyekto ken awan ti ordinansa nga inaprubaran ti konseho siyudad.
Iti 148-panid a desisyon nga inruar ti Special Seventh Division, napaneknekan a guilty beyond reasonable doubt da Bautista ken Cuña gaputi panaglabsing iti Section 3 ti Anti-Graft and Corrupt Practices Act.
Idi Hunyo 2024 nga inaklon ti actress nga adda relasyon da iti komedyante ken sigud a pulitiko a ni Herbert Bautista.
Kabayatanna, imbaga iti abogado ni Bautista a ni Atty. Nilo Divina nga iyapelarda ti nasao a kaso idiay Sandiganbayan.
