Pormalen a binigbig ti pagilian a Russia ti Taliban kas opisyal nga gobierno ti Afghanistan.
Ti Russia ti kaunaan a pagilian a nangbigbig ti Taliban government manipud ti panag-akem da iti puesto idi bulan ti Agosto, tawen 2021.
Kinuna ni Russian Foreign Ministry a makitkita ti Moscow ti napintas nga oportunidad para ti maur-uray a koordinasyon da, nangruna iti tay-ak ti seguridad, panagkontra ti terorismo, ken panangtaming ti illegal na droga.
Impeksa ti Russia ti interes da para ti saritaan ti ekonomiya, enerhiya, transportasyon, agrikultura, ken imprastraktura kabinnulig ti Taliban.
‘We believe that the act of official recognition of the government of the Islamic Emirate of Afghanistan will give impetus to the development of productive bilateral cooperation between our countries in various fields’
Kabayatanna, nagyaman met ni Afghan Foreign Minister Amir Khan Muttaqi idiay Moscow ken kinuna a daitoy a panagbigbig ti Russia ket mabalin a pagtuladanen dagiti sabali a pagilian.
Nupay awan pay ti sabali a pagilian a pormal a mangbigbigibig iti Taliban, sumagmamano met pagilian kas iti China, UAE, Uzbekistan, ken Pakistan ti nangidutoken ti ambassador da sadiay Kabul.
Maipalagip nga indeklara ti Russia a terorista a grupo ti Taliban idi tawen 2003. Inikkat da idi ban idi bulan ti Abril 2025. Manipud pay idi tawen 2022 agang-angkaten ti Afghanistan ti gas, langis, ken wheat manipud idiay Russia.
