LA UNION – Ibilang ni Russian Sports Minister Mikhail Degtyarev a dakkel a pannakapukaw ti pannakapaay dagiti atleta ti Russia nga maka-ayayam iti 2024 Paris Olympics.
Iti maysa nga interview, kinuna ni Degtyarev nga gapu ta saan a mapalubosan dagiti nalalaing nga atleta a mangibagi iti pagilianda. Kinunana a makadadael daytoy iti reputasion iti lubong ti isports.
Kampante met ti opisial ta adu a fans ken atleta iti intero a lubong ti mayat a makakita kadagiti atleta ti Russia. Kinapudnona, kinunana, manipud 2020 agingga 2023, nakipaset dagiti atleta ti Russia iti 8,000 nga international sports events.
Ti saan a panagay-ayam dagiti Russian athletes, kinunana, ket sigurado nga mangipakita ti panagbaba wenno permanente a panagbaba ti entertainment value ken kinaawan epektibo dagiti international tournaments.
Pinawilan met a maka-ayayam dagiti atleta ti Russia ken Belarus para ti Paris Olympics. Pagaammo nga agka-alyado dagitoy dua, nangruna iti panangraut ti Russia iti Ukraine idi 2022.
Nupay kasta, adda sumagmamano nga atleta a Rusia a nadetermina nga awan ti military connection.
Daytoy a desision ti International Olympic Committee ket immuna a kinondenar ti Russia.
