Raraemen ti Malacañang ti desisyon ni Vice President Sara Duterte a saan a dar-ayan ti maika-uppat a State of the Nation Address (SONA) ni Presidente Ferdinand Marcos Jr., inton Hulyo 28.
Segun kenni Palace Press Officer Claire Castro, adda latta iti bise presidente nu saan na a dar-ayan ti SONA ken awan metten para iti Palasyo nu saan na kayat a mangngegan dagiti programa ken naaramidan a trabaho iti Presidente.
Maipalagip a nag-abiso ti Office of the Vice President (OVP) iti House of Representatives sakbay pay a maipatulod ti formal invitation para iti SONA kadagiti opisyales ti gobierno, diplomatic corps, ken VIP guests.
Nupay kasta, mangitukon latta ti Kamara iti pagtugawan ni VP Sara malaksid pay iti holding room a nakareserba kenkuana ken kadagiti staffs na.
Daitoyen iti maikadua a saan a panagdar-ay ni VP Sara iti SONA ni PBBM kalpasan a kinunana idi damo a gundaway nga isuna ket maysa a “designated survivor.”
