Mamati ni sigud a Supreme Court (SC) Senior Associate Justice Antonio Carpio a mays a napintas a desisyon ti saan a panangisali kenni Atty. Harry Roque iti legal team ni sigud a presidente Rodrigo Duterte.
Immuna metten nga inaklon ni Bise Presidente Sara Duterte a saan a karaman ni Roque iti legal team laksid ti kellat a kaadda na iti Pre-Trial Chamber ti International Criminal Court (ICC).
Impaganetget ti sigud a mahistrado nga adda dagiti conflicting statement ni Roque maibusor ti sigud a presidente Rodrigo Duterte sakbay pay a nadutokan isuna idi ti posisyon.
Maysa ditoyen ti immuna a waragawag na a mangbabalaw ti extrajudicial killings (EJK), aglalo idi depedepensaan na pay dagiti nagbalin a biktima dagiti EJKs.
Segun kenni Justice Carpio, mays a dakkel a problema iti kampo ti sigud a presidente nu maipresentar iti prosecution dagiti immuna a waragawag ni Roque para iti panagdengngeg nga aramiden ti ICC, kasta met a posible nga agbalin pay daitoy a rason para iti naan-anay a pannakakumbikta ni Duterte.
Dayta ti rason kunana nu apay a napintas ti panangikkat kenkuana iti legal team, sakbay pay a mangrugi iti mismo a trial.
Ni Atty. Roque ket maysa a nalatak nga human rights lawyer ditoy Pilipinas ken karaman isuna kadagiti lima a naikkan ti accreditation ti ICC.
Siasinoman nga abogado a mangayat a mangibagi ti maysa nga indibidwal iti ICC ket nasken a naka-admit iti list of counsel ti korte.
