Dinillaw ni Senador Ping Lacson iti saan a patas ken palso nga alokasyon wenno panakabingay ti 2025 national budget para iti flood control project.
Segun iti senador, nadlawna iti dakkel a pondo para iti bassit a barangay ken ili a P1.9 billion kasta met ti sabali maysa pay nga ili nga addaan ti appropriations nga agarop P10 billion.
Gapo iti daytoy ket siguraduen ni Lacson nga iti panaglukat ti 20th Congress ket naurnos daytoyen a maimanehar.
Am-ammirisen na metten ken iti opisinana dagiti budget items para iti tawen 2023, 2024, ken 2025.
Maipalagip a sakbay a nalpas iti termino ti Senador idi 2022, impasiguro na ken ni sigud a Senador Franklin Dilon a maikkat iti appropriations para iti dredging ken flood control projects agsipudta maysa daytoy a ramot ti panagkunniber.
Adda metten iti naala na nga impormasion nga iti backhoe para iti flood control program ket maus-usar laeng no adda ti agin-inspeksion, ken nakaparadan no nakapanawen iti inspection team.
Kamaudiananna, nangiyebkas ti panakadismaya ni Lacson gaputa indeklara ti Korte Suprema nga unconstitutional iti Priority Development Assistance Fund (PDAF)-iti PDAF dagiti senador a P200 milion ken iti PDAF ti Kamara a P70 milion.
Imbutaktak na nga adda dagiti senador nga addaan ti P5 – P10 billion ken dagiti sumagmamano a kameng ti kamara ket addaan ti P15 billion.
Inladawan ni Lacson iti kasasaad ti pagilian a gumasgastos ti P16 billion ngem makapaspastrek laeng ti P12 bilion tunggal aldaw, isu ta kasapulan nga umutang ti P4 bilion kada aldaw. #
