BR LA UNION – Nangilatang ti piyansa a P90,000 ni sigud a Senator Ramon “Bong” Revilla Jr. iti kaso a graft nga adda pakainaiganna iti P92.8 million ghost flood control project idiay Pandi, Bulacan.
Ti inlatang a piyansa ni Revilla ket para laeng iti kaso a graft iti Fourth Division Clerk of Court ita a malem ti Martes, Enero 20 agsipudta awan ti kaibatugan a piyansa iti kaso na a malversation.
Kaipapanan daytoy a saan a mawaya-wayaan ni Revilla agsipudta nakapenpen ti kaso na a malversation iti anti-graft court.
Iti agdama, nakadetine ni Revilla iti New Quezon City Jail idiay Payatas, maibasar iti commitment order nga inuar ti Sandiganbayan Third Division.
Sumangsango ti sigud a senador iti kaso a graft ken malversation of public funds through falsification of public documents idiay Sandiganbayan Fourth ken Third Division.
Dagiti kaso ket indatag ti Office of the Ombudsman kalpasan ti insayangkat nga imbestigasyon iti tulong ti Department of Justice, ket adda nakita a probable cause nga awan ti proyekto a naaramid iti laksid a naideklara a kumpleto wenno nalpas ti proyekto.
