Natay iti lima a miyembro ti “Gapos” gang, a maipagarop a notoryus a grupo dagiti agtatakaw, kalpasan a naki-pinnaltog kadagiti otoridad idiay Bacoor, Cavite.
Naki-kinnamat pay dagiti suspek kadagiti otoridad babaen ti lugan, agingga a nabaliktad ti lugan dagiti suspek idiay Molino flyover.
Natay iti dua a suspek kalpasan ti pinnaltog bayat a dagiti dua pay a suspek ket ginandat da ti umagaw ti motorsiklo ngem nalapdan dagiti otoridad,.
Ti maika-lima a suspek ket timpuak manipud iti kotse kalpasanna ket naki-pinnaltog latta kadagiti pulis.
Kinumpirma ti pulisiya a ti maysa kadagiti suspek ket AWOL a pulis.
Maibasar iti imbesitgasyon dagiti otoridad, maipagarop nga adda target dagiti suspek a takawan iti maysa a subdibisyon isunga nangiwayat da a dagus ti operasyon ngem nagbalin a nadara ti engkuwentro.
Dagiti dua a suspek ket nabigbig nga isuda met laeng ti adda iti likod ti pannakatakaw ti maysa a jewelry shop idiay Cavite ket masansan nga igalot da dagiti biktima sakbay da a takawan dagitoy.
Agtultuloy ti panang-duktal dagiti otoridad iti pakabigbigan dagiti natay a suspek.
