LA UNION – Nainget metten a maipawpawil ti panaglako ken panaggatang iti arak iti siudad ti San Fernando, La Union kagiddan ti manamnama a panagduprak ti bagyo nga Ompong.
Maibasar iti executive order nga inyetnag ni City Mayor Hermenegildo Gualberto Jr., temporario a maiparit ti aginom kadagiti nasanger kas iti beer, arak, wine ken dadduma pay agingga a saan a makapanaw ti bagyo iti pagilian.
Gapu iti daytoy, na-deputized dagiti city police ken amin a barangay kapitan a mangtiliw ken mangipupok kadagiti aginom ti arak agingga a mausawan dagitoy.
Asino man a mapaneknekan nga aglabsing iti pagannurotan ket mapatawan iti kaskenan a pannusa ken maibabawi ti employment wenno business permit-da.
Iti agdama ket nakabayog pay laeng iti signal number 2 ti probinsia ti La Union gapu iti epekto ti bagyo nga Ompong.
