LA UNION – Nainget a kunkondinaren iti lokal a gobyerno ti San Juan, La Union dagiti nagsaruno a pammapatay ti nasao nga ili.
Kabayatan iti flag raising ceremony itattay bigat idiay munisipyo, impaganeget ni Mayor Valdriz a nasken marisot iti nasao a kaso tapno maipaayan iti hustisya dagiti biktima ken gapu ta mabalin a makaapektar daytoy iti imahe ti ili lalo kadagiti sumangbay a turista.
Gapu iti daytoy, binilin ti alkalde iti San Juan Police a mangisumite kenkuana iti report maipapan ti insidente.
Sigun kenni Mayor Valdriz, iti laeng nakadanun kenkuana nga inisyal nga impormasyon ket nabiktima laeng iti “mistaken identity” ti 64-anyos a lakay a napaltugan idi Sabado; kabayatan a maysa met a maipagarup a drug personality ti napapatay idi Domingo.
Kabayatanna, immunan a kinuna ni S/Supt. Ricardo Layug Jr., Provincial Director iti La Union Police Provincial Office, nga addan ti natukoyen a person of interest iti immuna nga insidente.
Ur-urayenda laengen iti resulta ti cross matching kadagiti naala a basyo ti bala idiay crime scene tapno maammuan no maymaysa a grupo dagiti suspek iti immatake iti nadakamat a lugar.
Nangnayon metten ti LUPPO iti nasao nga ili tapno mangipaay ti seguridad ken tumulong iti imbestigasyon iti nagsasaruno nga insidente ti pammaltog.
