Tehran, Iran — Inpakaammo ni Iranian Foreign Minister Abbas Araghchi a naikkaten ti sumagmamano a sanctions (sanctions) kontra iti oil exports ti Iran ken nairuar ti paset dagiti Iranian assets a nabayagen a na-freeze iti ballasiw-taaw kalpasan ti agsasaruno a saritaan idiay Switzerland.
Iti maysa a pakaammo a naipablaak iti social media platform nga X kalpasan ti panagleppas ti negosasion, kenuna ni Araghchi a naiyusuaten ti dakkel a plano para iti rekonstruksion ken development ti Iran.
Nupay kasta, saan a nangipaay ti kanayunan a detalye iti Foreign Minister maipapan iti balor dagiti nawayawayaan a sanikua wenno ti linaon ti nadakamat a development plan.
Saan pay a nangipaulog ti White House iti opisial a komento maipapan kadagiti statement ni Araghchi ken ti resulta ti saritaan.
Immunan nga inpadamag ni Hossein Ghorbanzadeh, maysa nga economic expert a paset iti delegasion ti Iran, a nalpasen ti maysa a draft agreement a mangipaay ti temporario a pannakawayawaya manipud kadagiti sansion nga impabaklay ti Estados Unidos iti lana ti Iran ken dagiti mainaig a produkto. Daytoy ket segun iti report ti semi-official a Fars News Agency.
Kabayatanna, kenuna pay ni Araghchi a ti umuna a karit iti baro a katulagan ket ti pannakaipatungpal ti Lebanon de-confliction cell, maysa a mekanismo a maibagbaga a napagnunumuan ti Estados Unidos ken Iran babaen kadagiti mangibabaet a Qatar ken Pakistan.
Panggep ti nasao a mekanismo a makatumulong a mangtaginayon iti cease-fire ken malapdan ti panagkaro manen ti operasion militar idiay Lebanon.
Dagiti kaudian a panagrang-ay ket maibilang a napateg nga addang iti panangpasayaat ti relasion iti nagbaetan ti Iran ken ti internasional a komunidad, bayat nga agtultuloy dagiti panagregget para iti nataltalged a seguridad ken ekonomia iti rehion.###
