Pinermaan ni US President Donald Trump iti executive order a mangipataw kadagiti sanction iti International Criminal Court (ICC) gapu iti maipagarup nga ilehitimo ken awan nakabasaranna a puntiria ti imbestigasionda ti America dagiti nasinged a kaalyado da.
Karaman kadagiti impabaklay a sanctions ni Trump ket dagiti financial/assets ken visa restrictions kadagiti indibidual wenno ICC officials ken dagiti pamiliada a timmulong iti international court investigation dagiti American nationals ken allies ti US.
Inaramid ni Trump ti panagpirma ti EO kasaruno ti isasarungkar ni Israeli Prime Minister Benjamin Netanyahu idiay Washington.
Segun kenni Trump, inabuso ti ICC ti pannakabalinna a mangipaulog iti base arrest warrant target ni Netanyahu ken dati a defense minister a ni Yoav Gallant.
Awan met ti hurisdiksion ti ICC iti US wenno Israel gapu ta saan met a kameng ti dua ti Rome Statute wenno ICC Member.
Kinunana pay a saan a binigbig ti dua a pagilian ti hurisdiksion ti ICC ken kinunana a isuda ti mangitantandudo iti demokrasia babaen ti militar a nainget a maitunos kadagiti laws of war.
Maipalagip a ti tignay ni Trump ket nagtaud iti ICC arrest warrant maibusor kada Netanyahu ken Gallant idi Nobiembre 2024 mainaig kadagiti maipagarup a war crimes idiay Gaza, banag nga inlibak met ti Israel.
Kabayatanna, imbestigaran met ti ICC dagiti maipagarup a war crimes nga inaramid ti US sadiay Afghanistan.
