BR LA UNION – Pinalubosan ti Regional Trial Court (RTC) Branch 27 idiay Lapu-Lapu City, Cebu iti kontrobersyal a contractor a ni Sarah Discaya a makapagpiyansa ti P1 million seknan iti kaso a malversation of public funds ken panaglabsing iti Anti-Graft and Corrupt Practices Act nga adda pakainaigan na iti maipagarop a ghost project idiay Davao Occidental.
Pinalubosaan pay ti korte iti finance officer ti Department of Public Works and Highways (DPWH) idiay Davao Occidental a ni Czar Ryan Ubungen a makapagpiyansa ti P300,000.
Segun kenni Judge Nelson Leyco ti RTC Branch 27, saan nga umdas dagiti ebidensya nga insango ti prosekusyon tapno agtalinaed iti pagbaludan dagiti dua bayat nga agtultuloy ti panagusig.
Kinuna ti korte, nga awan pay ti testigo a nakapaneknek iti nagbalin a papel ni Discaya iti maipagarop nga anomalya iti proyekto.
Maipagarop a saan met a napaneknekan nga isuna ti nagaramid iti peke a dokumento wenno naki-kinnutsabo iti dadduma pay nga akusado.
Kabayatanna, saan met a pinatgan ti korte iti kadawatan a makapag-piyansa dagiti walo pay nga akusado, kabilang ti sumagmamano nga opisyal ti DPWH ken maysa nga opisyal ti St. Timothy Construction.
Segun iti korte, mas napigpigsa dagiti ebidensya kontra kadakuada, nangruna kadagiti maipagarop a pineke a dokumento nga isuda a mismo ti nagpirma.
Inlawlawag met ti korte a ti panangipaay ti piyansa ket saan a kaipapanan nga awanen ti sungsungbatan iti akusado.
Ti panagpiyansa ket panangbigbig laeng iti karbengan ti maysa nga akusado a temporaryo a mawaya-wayaan bayat a madengdengngeg iti kaso.
Kasta metten, iti saan a panangipalubos ti korte a makapag piyansa ket saan met a kaipapanan a nagbasol iti akusado.
Ni Sarah Discaya ket sumangsango iti sabali pay a kaso nga adda pakainaiganna iti maipagarop a 53.9 million ghost project idiay Calumpit, Bulacan.
