BR LA UNION – Kinumpirma ti Philippine Coast Guard (PCG) a 15 a Filipino crew members ti na-rescue, dua ti natay, ken uppat pay ti mapukpukaw manipud iti limned nga M/V Devon Bay idi parbangon ti Biyernes, Enero 23, 2026 manipud aganay 100 kilometres (60 miles) amianan-a-laud ti Scarborough Shoal wenno aw-awagan ti China a Huangyan Dao.
Segun ti PCG, agtultuloy iti search and rescue operation ken nag-deploy da ti kanayunan nga assets iti kadanuman ken tangatang
Awan pay met iti inruar nga impormasyon ti Coast Guard seknan iti pakabigbigan dagiti natay a seafarers.
Bayat a dagiti 14 a naispal, 10 ditoy ti na-rescue ti barko ti Chinese Coast Guard ket adda dan iti natalged a kondisyon ngem maysa ti agtaltalinaed iti emergency medical treatment, segun iti Chinese embassy.
Ti M/V Devon Bay, a maysa a Singaporean-flagged cargo vessel, nagkarga ti iron ore, ket addaan ti 21 a Filipino crew members, naggapo idiay Gutalac, Zamboanga del Sur ken agturong koma idiay Yangjiang, China idi napasamak ti insidente.
Segun iti Phil.Coast Guard, naudi a nasaripatpatan ti cargo vessel iti kaadayu a 141 nautical miles laud ti Sabangan Point, Ango Bay, Pangasinan agarop alas 8:30 ti rabii idi Huwebes, Enero 22, 2026.
Mainaig ti dayta, nangipeksa ti panagyaman ti Philippine Coast Guard (PCG) ken Philippine Navy iti China Coast Guard iti inaramid da a panang-rescue kadagiti Filipino crew ti Singaporean-flagged cargo vessel MV Devon Bay.
Nakailanad iti United Nations Convention on the Law of the Sea (Unclos) nga amin a mariners ket obligasyon da a mangipaay ti tulong kadagiti tattao nga agpeligro iti panaglayag iti kabaybayan.
