LA UNION – Dead on the spot alas-6 itay laeng agsapa ti maysa a security guard ti hotel resort idiay ili ti San Juan, La Union kalpasan a pinaltogan ti saan pay a nabigbig a gunman.
Binigbig ti San Juan
Police Station ti biktima a ni Joaquin Peralta, 54-anyos, tubo iti ili ti Balaoan ken agindeg iti Barangay Mameltac, San Fernando City, La Union.
Maibasar iti inisial nga imbestigasion ti pulisia, lukatan koman ti biktima ti ruangan ti pagtrabtrabahoanna a resort iti Brgy. Ili Sur idi kellaat a nagsardeng iti sango daytoy ti agmaris iti yellow-green a motorsiklo kasaruno ti panangpaltog kenkuana ti suspek.
Napuntaan iti ulona ni Peralta a nagbanag iti daras a pannakatay daytoy.
Iti agdama ket dukduktalen dagiti otoridad ti motibo ken responsable iti pammaltog.
