BR LA UNION – Kinumpirma ti Philippine National Police (PNP) a kukua ti maysa a pulis ti maysa kadagiti dua a paltog nga inusar dagiti menor de edad iti pammaltog iti uneg ti pampubliko a pagadalan idiay Tacloban City idi bigat kalman, Hunyo 22, 2026.
Iti naisayangkat a press briefing, imbaga ni PNP Public Information Office (PNP-PIO) chief Col. Allen Rae Co a ti 9mm Glock a nausar iti insidente ket nakarehistro iti maysa a babae a pulis a nakadestino iti Police Regional Office 8 (PRO-8).
Segun iti PNP, ti nasao a pulis ket maim-imbestigaran ken naipasidong iti kustodiya ti regional police tapno maamwan nu anya ti sungsungbatan na, nangruna iti panangbaybay-a ti service firearm.
Agpar-parang iti imbestigasyon, a ti 14-anyos a suspek ket kaanakan ti nasao a pulis ken maipagarop a ginandat na ti aglemmeng kalpasan ti krimen ngem naarestar met laeng dagiti otoridad.
Kabayatanna, naduktalan dagiti imbestigador a ti maysa pay a paltog nga inusar ti 15-anyos a suspek ket nakarehistro iti maysa a security agency idiay Cebu.
Nakikoordinaren ti pulisya iti nasao nga ahensya tapno maamwan ti posible a security guard nga agtagikua ti armas.
Umabot iti 40 a basyo ti bala ti narekober iti naduma-duma a paset ti nakapasamakan ti insidente.
Umaboten ti 4 a tattao ti natay bayat a 15 dagiti nadun-dunor iti nasao a pammaltog iti uneg ti pagadalan.
Agtultuloy nga im-imbestigaran dagiti otoridad ti insidente, ken maysa a kangrunaan nga anggulo a makitkita ket bullying, a posible a nangiduron kadagiti suspek tapno aramiden ti krimen.
