BR LA UNION – Natured a bwineltaan ni Senador Francis “Chiz” Escudero ni Congressman Martin Romualdez idiay plenaryo ti Senado ita nga aldaw ti Lunes, Setyembre 29.
Kaiyarigan nga impaganetget ni Escudero a kaatnuman ket saanna a kadwa ni Romualdez ken tinakderanna a lumaban iti kunana nga “script ken sarswela” nga iwar-waras ti kongresista tapno tikawen ken pagapa-en dagiti umili.
Impaganetget ti senador, nu kayat a rumwar ti kinapudno, mapagsungbat ti pudno a suspek, ken maibalud ti pudno nga adda basol na, saan nga ayunan ni Romualdez.
Binabalaw ti senador iti maipagarop a taktika ni Romualdez a pag-ririr-yen dagiti opisyal ti gobyerno ken umili tapno maliklikan ti panangsingir ti rumbeng nga agsungbat.
Segun kenni Escudero, nalawag a paset daytoy iti plano ni Romualdez nga allilawen ti publiko ken ilisi ti imbestigasyon.
Kinuna na a rumbeng a pagsungbaten ken imbestigaran ti amin a nairaman ti naganna a Congressman, Senador, ken dadduma pay nga opisyal iti anomalya dagiti flood control projects, a pakairamanan ni Romualdez.
