Kinumpirma ti Senate Legislative Budget Research and Monitoring Office (LBRMO) nga awan ti opisyal a dokumento a mangpanpaneknek kenni Senator Jinggoy Estrada para ti panangisayangkat kadagiti insertions wenno amendments iti 2025 national budget mainaig kadagiti proyekto ti Department of Public Works and Highways idiay Bulacan.
Iti surat na sadiay Office of the Ombudsman, inlawlawag ti opisina a dagiti amin nga amendments nga inaprobaran ti plenaryo ket maibilang nga aramid ti Senado a kas institusyon ken saan a mainaig ti siasinoman a partikular a senador.
Dagiti gakat wenno rekomendasyon manipud iti opisina dagiti mambabatas ket maibilbilang kas internal working documents ken saan a paset ti aniaman nga opisyal a legislative records.
Napartuat ti waragawag kasaruno ti imbestigasyon ti Ombudsman kadagiti alegasyon a nakaawat ni Estrada kadagiti kickbacks manipud flood control projects – banag a nainget na a pinaglibakan.
Iti sabali a bangir ket agtultuloy met ti imbestigasyon tapno madakamat ti kinalawa ti anomalya ken pagsungbatan dagiti karaman iti isyu.
