BR LA UNION – Aminado ni Senate President Pro Tempore Panfilo “Ping” Lacson nga adda manen kasukat ti takder na kontra iti kinakusit, kagiddan ti bumarbara nga imbestigasyon ti Senate Blue Ribbon Committee kadagiti maipagarop nga anomalya iti flood control projects.
Segun kenni Lacson, kas chairman ti Blue Ribbon Committee, maipagarop nga adda dagiti gagayyem na nga umad-adayu ti rikna da kenkuana ken adda dagiti baro a ka-kontra na a mabukbukel bayat a sap-sapolen ti komite dagiti ebidensya ti kinakusit.
“Deja vu” ti panangawag ti senador, wenno kapad-pada ti napasamak kenkuana idi 2003 idi inlungalong na iti panangibasura ti sistema a pork barrel kabayatan ti privilege speech na a “Living Without Pork”
Iti maysa a waragawag imbaga ni Lacson nga ammo na nga adda dagiti posible a personal ken pang-pulitika nga epekto idi inawat na nga idaulwan ti komite.
Kinunana, ti imbestigasyon iti maipagarop nga anomalya iti flood control projects ken maysa kadagiti sensitibo nga isyu a sangsangwen ti senado iti agdama, agsipudta posible a mairaman iti sumagmamano a mammanday linteg ken nangangato nga opisyal ti gobyerno.
Iti likudan daytoy, tinakderan ti Senador nga agtalinad a nakasentro iti ebidensya ken mandato ti komite.
Kinuna na, saan nga agim-imbento ti istorya wenno mangiram-raman laeng ti uray siasino iti maisay-sayangkat nga imbestigasyon, sur-surutenna laeng iti itud-tudo ti ebidensya ken impaganetget na a nadalus ti konsensya na.
