BR LA UNION – Suportado ni Senate President Pro Tempore Ping Lacson da Senate Committee on Finance Chairman Senador Sherwin Gatchalian ken Senate President Vicente Sotto III iti panawagan nga ikkaten dagiti unprogrammed appropriations iti 2026 National Budget.
Segun kenni Lacson, makikaysa iti posisyon ti Senado ingkaso a pagdidiskutiran daytoy iti dua a pagpandayan linteg ti Kongreso iti Bicameral Conference Committee.
Impaganetget ti senador dagiti report idi Biyernes a mangibagbaga a tubngaren ti Kamara iti singasing a kissayan iti P250-bilyon nga unprogrammed appropriations.
Iti nasao a report, imbaga ni House Appropriations Chairperson Mikaela Suansing a saan a kabaelan nga ikkaten ti gobyerno iti pondo para kadagiti foreign-assisted projects.
Nu agtalinaed a nagduma iti posisyon ti Senado ken Kamara, imbaga ni Lacson a kadwa ti Senado dagiti umili a makarurod iti kinakusit ken panag-kunniber a timpuar gapu kadagiti anomalya iti flood control ken infrastructure projects.
Malaksid dayta, nagpanawagan pay ni Lacson kadagiti kakadwa na a mammanday linteg a liklikan iti panagikabi iti personal wenno individual amendments iti budget bill, ket agpokus iti institutional amendments a nakabase iti konsultasyon dagiti lokal a gobyerno.
