Agtalek ni Senate President Tito Sotto III a posible nga adda pay dagiti nangatngato a grupo ngem iti Bulacan Group of Contractors wenno BGC Boys nga adda iti likudan dagiti maanomalya a flood control projects.
Saan a kumbinsido wenno makapapati ni Sotto iti atgtultuloy a panaglibak ni Bulacan District Engineer Henry Alcantara nga adda pakainaigan na kadagiti proyekto a korap. Kinuna ti senador nga amin a BGC boys ket addaan ti pagsungbatan kadagiti kusit a proyekto ti Department of Public Works and Highways (DPWH).
Iti sabali a bangir ket imbatad ti Senate President a nakapatangen ni Justice Secretary Jesus Crispin Remulla dagiti agassawa a kontraktor nga isuda Pacifico Discaya ken Sarah Discaya para iti kidkiddawen da a witness protection program (WPP).
Impaganetget ni Sotto a nasken ket ited pay nga umuna dagiti agassawa a kontraktor ti amin nga ammo da a makatulong nga impormasyon sakbay nga aprobaran ti Department of Justice (DOJ) ti kiddaw da.
